مــغـلـق لـلــصـيـانـه

بسم الله الرحمن الرحيم مغلق للصيانه... كلمه اكيد قاريتها قبل كده كتير علي باب اي محل كبير او صغير كله بيجي عليه الوقت وبيحتاج صيانه عشان يرجع في حاله الطبيعيه ... لكن لما تيجي تفكر كده طيب الواحد مننا بقي مش لازم يعمل صيانه كده لما يجي عليه وقت ويفصل شحن زي ما بيقولوا... اكيد اي واحد فينا جت عليه -اكتر من- فتره وحس انه خلاص مش قادر يواصل الحياه تاني ومحتاج ياخد بريك -مش قصدي اعلان كتكات طبعا- عشان يعمل صيانه لنفسه كده ويرجع يعيش حياته الطبيعيه من تاني عشان بلغه الكومبيوتر ميهنجش... ولو بصيت حواليك كده هتلاقي معظم الناس بيجي عليهم الحكايه دي وكل واحد بيعمل صيانه بطريقته ... يعني مثلا واحد هتلاقيه ياخد اجازه من شغله ويطلع يسافر مش عارف فين -ومعاه الاسره الكريمه طبعا وميقدرش يتكلم- وصاحبنا التاني اللي بيحب يقعد لواحده، يعيش مع نفسه ويقعد سرحان وباصص للسقف لان غالبا ده بيكون بيعمل صيانه لقلبه بالذات بعد خناقه شديده مع خطيبته ولا حبيبته ، اما صاحبنا التالت بقي يحن لايام زمان ويحب يرجع بالزمن لورا شويه يقوم مكلم اصحاب زمان -شله الفساد يعني- ويخروجه خروجه يقعودوا يحلفوا بيها لحد ميعاد الخروجه اللي جايه ......وهكذا وهكذا . في طرق كتير بنعملها عشان نخرج من مود معين او من حاله وحشه بنمر بيها ... وكل واحد بيختار اللي يحس انه هيريحه ويعمله . ولكن تظل طريقه واحده هي التي تصلح مع كل فرد ايا كان حالته - معلش جمله بالعربي الفصيح كده عشان منساش الكلام اللي درسته بس- المهم الطريقه ايه هي بقي ...؟؟؟؟؟؟ باختصار هي انك تقرب من ربك ازيد ومتخليش لسانك يعدي عليه دقيقه من غير ما يذكر الله -الا بذكر الله تطمئن القلوب- والله عن تجربه .. كل لما تقرب من ربنا اكتر كل ما هتحس براحه نفسيه فظيعه وفعلا هتعمل صيانه بجد بقي - مع العلم اني جربت كل حاجه تانيه ممكن تتعمل-ودي اكتر حاجه ريحتني طبعا الحمدلله. يعني لو عندك حاجه خنقاك ومعكننه عليك عيشتك جرب تدعي ربك كده بأنه يزيل همك ويشرح قلبك وهتشوف النتيجه بــــــــــــاذن الله ..... ....... بس خلاص كفايه بقي كده السلام عليكوا :)